ലാപ് ടോപ്‌

" ചേട്ടാ എനിക്ക് ഒരു ലാപ്ടോപ് അയച്ചു തരണേ "

വീട്ടിലേയ്ക്ക് ഫോണ്‍ ചെയ്ത ഉടന്‍ അനിയത്തി അവനോട് ആദ്യം പറഞ്ഞത് അതാണ്‌.

" അതിനെന്താ ഞാന്‍ വെക്കേഷന്‍ വരുമ്പോ കൊണ്ടുവരാം "

" അത് പറ്റൂല്ല, ചേട്ടന്‍ ഇനി ഒന്നോ രണ്ടോ കൊല്ലം കൂടി കഴിഞ്ഞല്ലേ വരൂ, എനിക്ക് ഈ മാസം തന്നെ വേണം. "

" ഡീ അത് ... "

" പോ എന്നോട് ഒരു സ്നേഹോം ഇല്ല അതോണ്ടല്ലേ ഹ്മ്മം എന്നോട് ഇനി മിണ്ടണ്ട "

അവള്‍ പിണങ്ങി ഫോണ്‍ അമ്മയ്ക്ക് കൊടുത്തു.

" മോനെ അവള്‍ക്ക് അതൊരെണ്ണം അങ്ങ് അയച്ചു കൊടുത്തേരെ ഇല്ലേല്‍ ഇനി ഇതും പറഞ്ഞ് സ്വൈര്യം തരൂല്ല ... "

" മം നോക്കാമമ്മേ , പിന്നെ എന്താണ് വീട്ടിലെ വിശേഷങ്ങള്‍ "

" ആ അത് പറയാനിരിക്കുകയായിരുന്നു, ഈ മാസം കുറച്ച് കൂടുതല്‍ കാശ് അയയ്ക്കണം. ബാങ്കില്‍ നിന്ന് പേപ്പര്‍ വന്നിട്ടുണ്ട് ലോണിന്റെ, ഈ മാസം കുറച്ച് കൂടുതല്‍ തുക അടയ്ക്കണമത്രേ ,
പിന്നെ അറിഞ്ഞു കാണുമല്ലോ ഈ മാസമാ  ദേവൂന്റെ കല്യാണം ... അവള്‍ക്ക്‍ ഒരു പവനെങ്കിലും കൊടുക്കണ്ടേ നമ്മൾ ഇല്ലേല്‍ മോശമാ "

അത് പറഞ്ഞു അമ്മ ഒരു ദീര്‍ഘനിശ്വാസം ഇട്ടു ...

"  നിന്റെ പെണ്ണായി ഈ വീട്ടില്‍ വരണമെന്ന് അവൾ ഒത്തിരി ആഗ്രഹിച്ചതാ ഞാനും, പക്ഷെ നമ്മുടെ അവസ്ഥ ഇപ്പൊ ഇങ്ങനായിപ്പോയില്ലേ .... ... "

" അമ്മ ഇനി അതൊക്കെ പറഞ്ഞ്.... "

" ആഹ് അതും ശരിയാ വെറുതേ നിന്നെ വിഷമിപ്പിക്കുന്നില്ല, അപ്പൊ മറക്കണ്ട ഈമാസം കുറച്ച്‍ കാശ് കൂടുതൽ അയയ്ക്കാന്‍ , ഞാന്‍ വിനൂന് കൊടുക്കാം ഫോണ്‍ അവനു എന്തോ പറയാനുണ്ടെന്ന് നിന്നോട് "

" മം കൊടുക്ക് കുറെയായല്ലോ അവനോട് സംസാരിച്ചിട്ട് ഞാന്‍വിളിക്കുമ്പോളോന്നും അവന്‍ കാണില്ലല്ലോ വീട്ടിൽ "

" ചേട്ടാ വിനുവാ ചേച്ചിയ്ക്ക് ലാപ്ടോപ് അയക്കുമ്പോ എനിക്ക് ഒരടിപൊളി ഫോണ്‍ കൂടി അയയ്ക്കണേ, കോളേജില്‍ സ്മാര്‍ട്ട്‌ ഫോണ്‍ ഇല്ലാത്തെ ഞാന്‍ മാത്രെ ഉള്ളൂ. എങ്കില്‍ ശരി ഞാന്‍ അച്ഛന് കൊടുക്കാം "

" അച്ഛാ "

" പറേടാ നീ വല്ലതും കഴിച്ചോ "

" മം കഴിച്ചു ... അച്ഛന്‍ കേട്ടില്ലേ എല്ലാം... ഇനി പറ അച്ഛന് എന്താണ് ഞാന്‍ അയക്കേണ്ടത് ... "

" എനിക്കൊന്നും വേണ്ടടാ നീ വെക്കേഷന് വരുമ്പോ ഡ്യൂട്ടി ഫ്രീ ന്നു വാങ്ങുന്ന ഒരു ബോട്ടില്‍ അത് ധാരാളമാ എനിക്ക് "

എല്ലാം കഴിഞ്ഞ് ഫോൺ വെയ്ക്കുമ്പോൾ അവന്‍റെ കയ്യിലിരുന്നു ചിരിക്കുന്നുണ്ടായിരുന്നു ഈ മാസത്തെ സമ്പാദ്യമായ ആയിരം ദിര്‍ഹം...

അന്ന് കഴിക്കുമ്പോൾ കുബൂസ് കരയുകയായിരുന്നിരിക്കണം, അതാവാം ഡാലിനോടൊപ്പം  പതിവില്ലാതെ ഇന്നവന് ഉപ്പ് രസം കൂടുതല്‍ തോന്നിയതും...