ബീഫ് പറഞ്ഞ ബാല്യം

സ്കൂളില്‍ പോയിട്ട് വീട്ടിലോട്ട് വരുമ്പോ തോമാച്ചായന്റെ
കടേലെ അടുക്കളയില്‍ നിന്ന് വരുന്ന ഒരു പ്രത്യേകതരം കാറ്റൊണ്ട്
ആ കാറ്റാണ് കുട്ടിക്കാലത്ത് എന്നെ ഒരു ഇറച്ചി കൊതിയനാക്കിയത് ...

എങ്ങനേലും അവിടുന്ന് പൊറോട്ടയും ഇറച്ചിയും കഴിക്കണം.
ഒരു ദിവസം ആരും കാണാതെ അമ്മേടെ പേര്‍സീന്ന് അഞ്ചു രൂപയും അടിച്ചു മാറ്റി നേരെ അങ്ങട് കയറിചെന്നു.

" അച്ചായാ മൂന്ന് പൊറോട്ടയും ബീഫും എത്രയാ "

" എട്ടു രൂപാ "

അയ്യോ എന്‍റെ കയ്യില്‍ അഞ്ചു രൂപേ ഉള്ളല്ലോ ശ്ശെ പത്തു രൂപാ എടുക്കണ്ടാതാരുന്നു.
എന്തായാലും വന്നു ഇനി കഴിക്കാതെ പോയാല്‍ ശരിയാവില്ല

" അച്ചായാ മൂന്ന് പൊറോട്ട "

പിന്നെ ശബ്ദം താഴ്ത്തി പറഞ്ഞു

" ഇത്തിരി ബീഫിന്റെ ചാറും "

എന്‍റെ നിഷ്ക്കളങ്കമായ മുഖം കണ്ടാവണം പൊറോട്ടയുടെ മുകളില്‍ ചാറിന്റെ കൂടെ രണ്ട് പീസ്‌ ഫ്രീയായി ഇട്ടു തന്നു തോമാച്ചായന്‍.
പാവം സ്നേഹമുള്ള തോമാച്ചായന്‍

ബീഫിന്‍റെ പീസ്‌ കണ്ടതും എന്‍റെ മനസ്സില്‍ ലഡ്ഡു പൊട്ടി ആര്‍ത്തി മൂത്ത് നേരെ അതെടുത്തു വായിലിട്ടു ഒറ്റക്കടി

" അമ്മേ ന്‍റെ പല്ല് .... യ്യോ ... ".

ദുഷ്ട്ടന്‍  ആകെത്തന്ന രണ്ടുകഷ്ണത്തില്‍ ഒരെണ്ണം എല്ലിങ്കഷ്ണം ഹ്മം
ആരേലും കണ്ടാ എന്ന് ചുറ്റും നോക്കിയപ്പോ ദാ പുള്ളി നൈസ് ആയി എന്നെ നോക്കി ഇളിക്കുന്നു...

ഇനി അബദ്ധം പറ്റരുതെന്ന് വച്ച് അടുത്ത കഷ്ണം എടുത്തു പയ്യെ വായിലാക്കി
ആഹ ഇത് കുഴപ്പമില്ല സോഫ്റ്റ്‌ ടേസ്റ്റ് ഉണ്ട് കോളടിച്ചു എന്ന് വച്ച് ചവച്ചു തുടങ്ങി
ഹേ ഇതെന്താ ബബിള്‍ഗം ആണോ ചവച്ചിട്ടും ചവച്ചിട്ടും തീരുന്നില്ലല്ലോ
പണ്ടാരം അവിടേം പണി ഹ്മം

പിന്നെ ഉള്ള ഇറച്ചിചാറില്‍ മുക്കി പറോട്ട പയ്യെ  ആസ്വദിച്ചു കഴിചോണ്ടിരുന്നപ്പോള്‍ ആണ് ഒരു അലര്‍ച്ച കേട്ടത്

" ഡാ "

തിരിഞ്ഞു നോക്കിയപ്പോ ദേ നിക്കണ്  നമ്മടെ അച്ഛന്‍തിരുമനസ്സ്

സ്വപ്നം കാണുവാേണാ ഒന്ന് കണ്ണ് തിരുമ്മി നോക്കി
അല്ല സത്യം തന്നെ യ്യോ
കഴിച്ച മൂന്നു പൊറോട്ടയും ചാറും എല്ലാം അപ്പൊ തന്നെ ദഹിച്ചു എനിക്ക് വീണ്ടും വിശക്കാന്‍ തുടങ്ങി

" സ്കൂള്‍ വിട്ടാല്‍ വീട്ടില്‍ പോവാതെ ഇവിടെന്താടാ നിനക്ക് കാര്യം "

" അത്  അച്ഛാ.....  ഈ..... തോമസ....ച്ചായന്‍..... വിളി....ച്ചപ്പോ ഞാ......ന്‍ വെ....റുതെ ഇങ്ങോട്ട് "

ഇതെല്ലാം കണ്ട് കിണിചോണ്ടിരുന്ന പാവം തോമാച്ചായന്‍ ഇത് കേട്ട് കണ്ണുതള്ളി

" ഞാനോ  എപ്പോ "

പ്യാവം അച്ഛന്‍ അപ്പൊ തന്നെ എന്നെ ചെവിയില്‍ തൂക്കിഎടുത്തു

" വീട്ടില്‍പോടാ "

എന്ന് പറഞ്ഞ് പുറത്തോട്ട് എറിയുകയും കിട്ടിയ ചാന്‍സ് മുതലാക്കി തിന്ന പൊറോട്ടയുടെ കാശും കൊടുക്കാതെ നൂറെ നൂറ്റിപ്പത്തില്‍ ഒറ്റ ഓട്ടത്തിന് ഞാന്‍ വീട്ടിലെത്തി...

ഇനി എന്താ വീട്ടില്‍ സംഭവിക്കുന്നതെന്നറിയാം ചെമ്പരത്തിക്കമ്പ് കൊണ്ട് അച്ഛന്‍ എന്‍റെ ചന്തിയില്‍ ചിത്രം വരയ്ക്കും

അതിനെ പ്രതിരോധിക്കാന്‍ മൂന്ന് നിക്കറും വലിച്ചുകേറ്റി ഞാന്‍ റെഡിയായി നിന്നു

 അച്ഛന്‍ വന്നു പക്ഷെ എന്നെ തല്ലിയില്ല

എന്നെ വിളിച്ചു ഒരു പൊതി കയ്യില്‍ തന്നു

തുറന്നു നോക്കിയപ്പോ നല്ല ചൂട്  പൊറോട്ടയും ബീഫും

അന്ന് വില്ലനാവുമെന്ന് ഞാന്‍ കരുതിയ അച്ഛന്‍ എനിക്ക് നായകനായി

" നല്ല അച്ഛന്‍ ചക്കര അച്ഛന്‍ "

" ഡാ ഡാ മതി കൊണ്ടുപോയി കഴിക്ക് രണ്ടുപേരും കൂടി "

ഇത്തിരി ചാറും ഒരു പൊറോട്ടയും അനിയത്തിക്ക് കൊടുത്തിട്ട് ബാക്കി മുഴുവന്‍ ഞാന്‍ ഇരുന്നങ്ങ്  വെട്ടിവിഴുങ്ങി
എല്ലാം കഴിഞ്ഞു അനിയത്തിയുടെ പാത്രത്തില്‍ നിന്ന് ഒരു കഷ്ണോം അടിച്ചു മാറ്റി ഓരോട്ടവും ...

ഓര്‍ക്കുമ്പോ ഇതാ ഇപ്പോളും നാവില്‍ വെള്ളമൂറും തോമാച്ചായന്റെ കടേലെ പൊറോട്ടയും ബീഫും